Në kuadër të përpilimit të raportit të tretë monitorues për Kontratën Sociale në Bashkinë Tiranë, Qendra Aleanca Gjinore për Zhvillim (GADC) organizoi sot një fokus grup me banorët e njësisë administrative Farkë për të diskutuar mbi çështjet dhe problematikat që i shqetësojnë ata, si dhe mbi punën e Bashkisë.

Nevojë emergjente është ndërtimi i çerdheve për fëmijët pasi nuk ka asnjë dhe ka vetëm një kopsht pa drekë, deri në orën 12:00. Projekti i miratuar për ndërtimin e çerdheve në Farkë, Lundër dhe Çollak nuk është zbatuar ende. Emergjent është gjithashtu problemi i mungesës së transportit publik në të gjithë njësinë. Një tjetër çështje e ngritur është mungesa e qendrave sociale për familjet në nevojë dhe personat me aftësi të kufizuar. Banorët vënë në dukje edhe mungesën e personelit dhe orarit mjekësor në Ambulancë, pasi një mjek mban tre lagje të njësisë Farkë.

Të gjitha gjetjet nga këto takime do të pasqyrohen në raportin e vitit të tretë monitorues ku do të analizohet puna e Bashkisë Tiranë për përmbushjen e Kontratës Sociale.