Forumi Publik në Korçë – Përballja e Ofertave Politike për Zgjedhjet Parlamentare 2025
Më 22 prill, Korça mirëpriti një forum të hapur qytetar, të organizuar nga Gruaja në Zhvillim Korçë dhe POP – Përballja e Ofertave Politike.
Ky aktivitet nuk ishte thjesht një prezantim programesh – ishte një hapësirë thelbësore e dialogut të drejtpërdrejtë midis qytetarëve dhe kandidateve, për të nxitur vendimmarrjen e informuar dhe përgjegjëse në prag të zgjedhjeve parlamentare të 11 majit 2025.

Kandidatët pjesëmarrës:

• Lëvizja Bashkë: z. Petro Lubonja
• Koalicioni Euroatlantik: znj. Laureta Alidinaj Besholli
• Koalicioni Nisma Shqipëria Bëhet: z. Klajdi Pllaha
• Partia Mundësia: z. Ilirian Agolli

Ata prezantuan prioritetet për zhvillimin e rajonit dhe iu përgjigjën pyetjeve mbi tema kyçe si: zhvillimi ekonomik, barazia gjinore, transparenca, antikorrupsioni etj.

Mungesa e kandidatëve të subjekteve të tjera zgjedhore të ftuara – si Aleanca për Shqipërinë Madhështore, Partia Socialiste, Aleanca Kombëtare Shqiptare dhe Partia Social Demokrate – ishte për të ardhur keq. Kur forcat politike nuk zgjedhin të përballen me qytetarët në mënyrë publike, humbet një mundësi e vlefshme për dialog dhe llogaridhënie.
Ne besojmë se pjesëmarrja në forume të tilla është një detyrim demokratik dhe shenjë respekti ndaj zgjedhësve.

Këto forume synojnë të forcojnë demokracinë pjesëmarrëse, promovojnë debate të hapura dhe të ndershme, dhe ndihmojnë qytetarët të krahasojnë ofertat politike përpara se të votojnë më 11 maj.

Zgjidh me mendje, jo me zakon!
Zgjedhjet janë më 11 maj – voto me dije, jo me dyshim!